आइतबार, भदौ १४, २०८३
कर्पोरट खबर
3:34 pm, आइतबार, भदौ १४, २०८३
काठमाडौं। धादिङको बेनीघाट रोराङ गाउँपालिका-७ स्थित कृष्णभीरमा सडक ठूलो मात्रामा भासिएपछि पृथ्वी राजमार्गको आवतजावत पूर्णरूपमा ठप्प भएको छ।
सडकको अवस्था यति जोखिमपूर्ण बनेको छ कि पैदल यात्रुलाई समेत आवतजावत गर्न कठिन भएको छ। नदीको बहाव बढेसँगै सडकको किनारतर्फ तीव्र कटान भएपछि सडकको केही भाग भासिएको हो। सडक जोखिमपूर्ण बनेपछि दुवैतर्फको सवारी आवागमन रोकिएको छ।
सडक अवरुद्ध हुँदा काठमाडौं, पोखरा, चितवन तथा मुग्लिनतर्फ जाने–आउने यात्रु र सवारीसाधन प्रभावित भएका छन्। सडक खुलाउन सम्बन्धित निकायले क्षतिको निरीक्षण तथा आवश्यक मर्मतको तयारी गरिरहेको जनाएको छ।
त्रिशूली नदीमा पानीको बहाव उच्च रहेकाले कृष्णभीर क्षेत्रमा थप सडक कटान र पहिरोको जोखिम कायम रहेको छ। सुरक्षाका दृष्टिले यात्रु तथा चालकलाई उक्त सडकखण्डमा यात्रा गर्दा विशेष सावधानी अपनाउन आग्रह गरिएको छ।
सडक कहिलेसम्म पूर्णरूपमा सञ्चालनमा आउँछ भन्ने विषयमा सम्बन्धित निकायबाट औपचारिक जानकारी आउन बाँकी छ।
