पशुपतिमा राखिएको सुनको जलहरी आधा केजी कम

काठमाडौं । अख्तियार दुरुपयोग अनुसन्धान आयोगको टोलीले पशुपतिनाथमा राखिएको सुनको जलहरी जोख्दा आधा केजी कम भेटिएको छ । आइतबार दिउँसो जलहरी जोख्न पशुपतिनाथ पुुगेको अख्तियारको टोलीले सोमबार बिहान २ बजेसम्म लगाएर जलहरी जोखेको हो।

अख्तियारको टोलीले उक्त सुन जोख्दा आधा केजी कम पाइएको छ। सुन जोख्न पशुपति पुगेका टोलीमध्येका एक सदस्यका अनुसार जलहरीमा प्रयोग भएको भन्दा आधा केजीमात्र सुन कम पाइएको हो।

त्यसमध्ये जलहरीको रिङ र बेल्टमा १० दशमलव ४३२५ मा प्रयोग भएको पाइएको छ। त्यस्तै, किला र काँटीमा १ दशमलव ०३७५ केजी सुन प्रयोग भएको पाइएको ती सदस्यले जानकारी दिए।

जलहरीमा प्रयोग भएको सुनमध्ये १०७ केजी ९५३ केजी सुन अहिले पाइएको हो।

तत्कालीन प्रधानमन्त्री केपी शर्मा ओलीका पालामा १०७ केजी ९२४ दशमलव ७४ ग्राम सुन प्रयोग गरी जलहरी बनाइएको बताइएको थियो। उक्त सुनमा तामा र पित्तल थप गरी १०८ केजी भएको भनिएको उक्त जलहरीलाई लिएर संसदमा विवाद भएको थियो।