बिहीबार, असार १८, २०८३
कर्पोरट खबर
12:39 pm, बिहीबार, असार १८, २०८३
काठमाडौं । ग्लोबल आइएमई बैंक लिमिटेडले डिजिटल बैंकिङ ठगी (फिसिङ र स्क्याम)बाट ग्राहकको निक्षेप सुरक्षित राख्न मोबाइल एपमा लगइन समेत गर्नु नपर्ने गरी सेकेन्डभरमै खाता रोक्का (ब्लक) गर्न सक्ने अत्याधुनिक प्राविधिक प्रणाली सञ्चालनमा ल्याएको छ ।
वित्तीय तथा डिजिटल साक्षरताको अभावका कारण पछिल्लो समय मुलुकभर अनलाइन ठगीका घटना तीव्र रूपमा बढेपछि निजी क्षेत्रको सबैभन्दा ठूलो यो वाणिज्य बैंकले ग्राहकको मिहिनेतको कमाइ सुरक्षाका निम्ति यस्तो कडा सुरक्षात्मक व्यवस्था मिलाएको हो ।
बैंकका अनुसार, ग्राहकलाई कुनै पनि सम्भावित वित्तीय ठगी, अनधिकृत पहुँच वा खाता ह्याक भएको शंका लागेमा बैंकको ‘ग्लोबल कनेक्ट’को आधिकारिक नम्बर ०१–५९७०६०० वा अन्तर्राष्ट्रिय कलका निम्ति +९७७–१–५९७०६०० मा फोन गरेर मौखिक रूपमै खाता ब्लक गराउन सक्नेछन्
यसका साथै मोबाइल एप प्रयोग गर्ने ग्राहकका निम्ति यो सेवा झनै सहज र द्रुत बनाइएको छ । ग्राहक आफैँले बैंकको मोबाइल बैंकिङ एप ‘ग्लोबल स्मार्ट प्लस’मार्फत सुरक्षित रूपमा खाता रोक्का गर्न सक्नेछन् । यो प्रविधिको मुख्य विशेषता भनेको ग्राहकले एपभित्र पासवर्ड वा जैविक पहिचान (बायोमेट्रिक) हानेर लगइन गरिरहनु पर्दैन ।
एप खोल्नासाथ माथिल्लो दायाँ कुनामा देखिने ‘कल साइन’मा क्लिक गरी ‘मिसकल बैंकिङ’भित्र रहेको ‘अकाउन्ट ब्लक बाई मिसकल’ विकल्प छनोट गर्नासाथ बैंक खाता तत्कालका निम्ति पूर्ण रूपमा रोक्का हुनेछ ।
ग्लोबल आइएमई बैंकको यो अत्याधुनिक एवं द्रुत सेवाका कारण ‘फिसिङ’ र ‘स्क्याम’जस्ता अनलाइन बैंकिङ अपराधमा तत्कालका निम्ति ‘ब्रेक’ लाग्ने र सर्वसाधारणको निक्षेप सुरक्षित राख्नेछ ।
नेपाल राष्ट्र बैंकले पनि हालै सम्पूर्ण वाणिज्य बैंकलाई ग्राहक वा खातावालाको मौखिक वा अनलाइन अनुरोधका आधारमा तुरुन्त खाता रोक्का गर्ने व्यवस्था मिलाउन नयाँ निर्देशन जारी गरेको छ । केन्द्रीय बैंकको यो निर्देशनले समग्र बैंकिङ क्षेत्रमा ग्राहक सुरक्षालाई थप सुदृढ बनाउने र ग्लोबल आइएमई बैंकजस्ता अग्रणी संस्थाको सुरक्षित प्रविधिले यो कार्यलाई थप प्रभावकारी बनाउने विश्वास गरिएको छ ।
